Zeserbšćenje Firefoxa z rěcnym pakśikom

1. Mozilla Firefox ześěgnuś

Mimo zeserbšćenja z kompletnym programowym archiwom jo hyšći móžnosć, Firefox z pomocu rěcnego pakśika zeserbšćiś. Jolic cośo rěcny pakśik wužywaś, dej Firefox južo na wašom licadle instalěrowany byś.

2. Dolnoserbski rěcny pakśik instalěrowaś
• Awtomatiska instalacija

Pśi ześěgnjenju rěcnego pakśika jo awtomatiska instalacija móžno. Pśi kliknjenju na zešěgowańsku wótkaz zjawijo se jano mały dialogowy kašćik z warnowanim. Jolic z "Jetzt installieren" (eng. Install Now) wobkšuśijośo, instalěrujo se Firefox awtomatiske do wašogo programowego profila. Trjebaśo pótom jano Firefox hyšći raz startowaś a Firefox buźo pótom dolnoserbski.

• Manuelna instalacija

Za manuelnu instalaciju dejśo dolnoserbski rěcny pakśik na twardej plaśe składowaś, pótakim na wašo licadło do zapisa wašeje wólby ześěgnuś. Za tym až sćo programowe dataje Firefox a dolnoserbski rěcny pakśik ześěgnuł a program Firefox instalował, móžośo něnto dolnoserbski rěcny pakśik instalěrowaś.

Glědajśo: Cysle wersije programowych datajow a pśisłušnego rěcnego pakśika deje jadnak byś.

Na pś. za Mozilla Firefox wersiju 12.0 trjebaśo teke rěcny pakśik wersije 12.0 Startujśo za to Mozilla Firefox (hyšći engelsku abo nimsku wersiju) a źiśo na Datei (File) - Datei öffnen... (Open File...). W dialogowym woknje, kótarež se něnto wocynijo, nastajijośo zarědnik, do kótaregož sćo dataju rěcnego pakśika ześěgnuł, wubjeŕśo toś tu dataju a wócynijośo dataju z kliknjenim na tłocašk Öffnen (Open).

Klikniśo pótom na tłocašk Jetzt installieren (Install Now) (z Abbrechen (Cancel) móžośo pśetergnuś) a slědujśo instalaciju, daniž njejo dokóńcona.
3. Dolnoserbski pakśik aktiwěrowaś

Bóžko njedawa Firefox móžnosć rěc rěcnego pakśika awtomatiski wužywaś. Rěcny pakśik dej se nejpjerwjej manuelnje aktiwěrowaś.

Za to ekistujotej 2 metoźe: Móžośo Firefox z pśikazoweje smužki abo ze zwiska na desktopje z opciju -UILocale dsb startowaś, na pś. C:\Programme\Firefox\firefox.exe -UILocale dsb. Město C:\Programme\Firefox\ dejśo zawěsće sćažku wužywaś, kótaraž k městnoju wašeje Firefox-instalacije wjeźo.

Druga móžnosć jo programowe rozšyrjenje Locale Switcher wót B. Smedberga. Instalacija se kaž z rěcnym pakśikom pśewjeźo, z Datei - Datei öffnen... (File - Open File ...). Rowno tak kaž rěcny pakśik se toś to rozšyrjenje do menija Extras - Add-ons (Tools - Add-ons) zapisujo. Pó znowegostartowanju Firefoxa namakajośo w meniju Extras (Tools) zapisk Languages) z pódzapiskoma English (United states) a (jolic sćo južo dolnoserbski rěcny pakśik instalěrował) dsb. Klikniśo pótom na zapisk dsb a startujśo Firefox znowego.

Glědajśo: Za dolnoserbski rěcny pakśik njetrjebaśo Locale Switcher instalěrowaś, toś to rozšyrjenje jo južo w dolnoserbskem rěcnem pakśiku wopśimjone. Trjebaśo pótakim jano do menija Extras (Tools) hyś, na dsb kliknuś a Firefox znowego startowaś. Pótom Firefox buźo dolnoserbski.